Ramnkjell - ei sann historie eller ein roman?

Forfatter:	Einar Nodland
Dato:	24. september 2003 19:46
Når ein skal tolke Soga om Ramnkjell Frøysgode, kan det vera interessant å stille spørsmålet om soga er historisk sann. Mykje kan tyde på at soga er ein roman skrive av ein religiøs person. Soga bryt med den autoral, referande synsvinkelen som er vanlig i ættesoger. Det blir til dømes brukt tankereferat (Einar tenker) fleire stader, og det blir fortalt om forhold der det ikkje kan ha vore vitne. Dessutan byggjer heile konstruksjonen i soga på at drapet på Einar blir tatt opp på Alltinget; noko som var uvanlig for slike drap som skulle avgjerast på eit lokalt ting. Utan  Såms samarbeid med Tjostersønene på Alltinget, hadde det vore umogleg å ta opp kampen mot Ramnkjell.  Heile soga er med andre ord lite truverdig. Soga innheld mange allusjonar til Bibelen som eg viser til i gjennomgangen i klassen. Dette må bety at forfattaren må ha hatt kjennskap til Bibelen. Ein kan og stille spørsmålet om ikkje soga har ein kristen bodskap. Ramnkjell gjer avkall på dei heidenske gudane, og etter det blir han eit betre menneske og det går han godt. Soga endar med at at Ramnkjell får godet sitt attende, og han døyr på sotteseng. Det vonde i soga er symbolisert med hesten Frøyfakse, som nettopp er helga (gitt) til den heidenske guden Frøy, og det er denne hesten som fører til drap og hemnakt. Elles er soga skrive i ein typisk ordknapp sagastil der ein brukar få ord i dramatiske situasjonar, mens vegval og ridevegar er nøye skildra for å understreke at soga er sann.